Dako ang kalipay nga nasinati sa mga Child Development Workers (CDW’s) dinhi sa lungsod sa Bantayan kay sa labing unang higayon, nakakab-ot sila og Level 3 rating.
Kini nagpasabot nga ang mga CDWs (mga kanhi day care workers) giisip nga ‘Highly Satisfactory’ sa ilang trabaho ug nahatagan og 5 stars ang ilang mga centers atol sa gipahigayon sa DSWD Region 7 Child Development Centers (CDCs) ug CDW's accreditation.
Ang 5-star accreditation mo-expire sulod sa lima ka tuig. Gawas niini, record-breaking usab ang kalampusan nga dili lang usa ka CDC sa Bantayan ang nakakuha og 5-star kon dili, 22 ka CDCs ang nakakab-ot sini nga rating. Sulod sa 30 ka tuig nga milabay sa sige ug pa-accredit sa mga CDCs, sara da gayud nahatagan ug hustong pagtagad ang Bantayan Early Childhood Care and Development Program (BECCDP), matud pa sa mga CDWs.
Basi sa natala nga report sa buhatan sa BECCDP, 86% ang paglambo sa accreditation level sa mga CDCs ug 77% ang paglambo sa mga CDWs sa gipahigayon nga accreditation. Kini human gilibot sa mga accreditors ang 37 ka gipa-accredit nga CDCs sulod sa 25 ka barangay niadtong Abril 25-29, 2022.
“Congratulations to all CDWs in this unprecedented achievement. This is what happens when leadership and hardwork meet passion,” matud ni Mayor Arthur E. Despi.
Ubos sa administrasyong Despi, gitinguha nga maumol gayud pagayo ang mga kapuyahan nga nagtungha sa CDCs. Buot sa Mayor nga ipa-ubos sa accreditation ang tanang CDWs aron makatudlo sila sa mga CDCs ug aron maandam usab sila sa higayon nga mahibalik ang face-to-face classes sa mga puya.
Sa kinatibuk-an, ang Munisipyo sa Bantayan adunay 53 ka CDCs ug 98% niini ang hingpit nga akreditado. Gawas sa 22 ka CDC nga adunay Level 3 (5-star) nga rating, walo ang adunay Level 2 (4-star) nga rating, 21 ang adunay Level 1 (3-star) rating, usa adunay accreditation sa Supervised Neighborhood Play (SNP) ug usa na lang ang nahabilin nga CDC nga wala pay accreditation tungod kay bag-o pa kini natukod.
Source:
Municipality of Bantayan Official Page
https://www.facebook.com/BayanngBantayan