Laing unom ka barangay sa lalawigan sa Sugbo ang gideklarar nga ‘drug-cleared’ sa Regional Oversight Committee on Barangay Drug Clearing (ROCBDC) nga gilangkoban sa Department of the Interior and Local Government (DILG), Philippine National Police (PNP), Department of Health (DOH), ug Philippine Drug Enforcement Agency (PDEA).
Kini nagpasabot nga ang maong mga dapit, wa na gayuy bisan unsang klase sa problema nga adunay kalabutan sa iligal nga droga.
Sa unom ka mga barangay nga gideklarar nga drug cleared, tulo niini ang ania sa lungsod sa Bantayan — ang Baod, Botigues, ug Kampingganon.
Ang laing tulo ka barangay sa lalawigan sa Sugbo nga gideklarar nga drug cleared sa ROCBDC mao ang barangay Kabalaasnan ug Pawa sa lungsod sa Dumanjug, ug Barangay Polog sa Consolacion.
Gideklarar usab nga drug cleared sa ROCBDC ang mga lungsod sa Madridejos, Santander, ug San Francisco.
Ang bag-ong pagdeklarar sa Baod, Botigues, ug Kampingganon nga drug-cleared nagdala sa kinatibuk-ang gidaghanon sa mga drug-cleared barangay sa lungsod sa Bantayan ngadto na sa 18 lakip ang Putian, Baigad, Tamiao, Sillon, Binaobao, Suba, Guiwanon, Kabangbang, Sungko, Kangkaibe, Mojon Obo-ob, Luyong Baybay, Atop-atop, ug Doong.
Pito nalang sa 25 ka barangay sa lungsod ang wala pa madeklarar nga drug cleared: Patao, Sulangan, Kabac, Bantigue, Hilotongan, Ticad ug Lipayran.
Gitinguha ni Mayor Arthur E. Despi pinaagi sa Municipal Anti-Drug Abuse Council (MADAC) nga masugpo na gayud ang illegal drugs sa Bantayan ug makab-ot naton ang Drug-Cleared Municipality status.
Lakip sa 10-point agenda ni Mayor Despi mao ang pagsiguro nga ang Bantayan magpabilin nga malinawon pinaagi sa pagwagtang sa iligal nga droga ug pagminus sa tanang klase sa krimen aron bisan kinsa mahimong makalakat sa aton kadalanan sa bisan unsang orasa nga kanunay mobati nga luwas.
Source: Municipality of Bantayan Official Facebook Page